عدى يوم 4 مايو بكل اللى فيه من سلبيه والناس تقريبا ماكنتش تعرف ان فيه حاجه فى اليوم دا
عدى اليوم ولا حاجه حصلت اصل الحكومه كانت عملها حسابها لحركات العوء (عين فتحه عا , واو فتحه وا , والهمزه عليها سكون ) حركات العوء الشعبى المتحضره
يعنى تشكيلات امنيه جديده ( غير اللى كانت موجوده بالفعل ) وكام حقنه تسكين كدا منها الزياده ال 30 دى
وغير كدا متلاقيش يا شعب بيدور على الفتافت مش بيدور على الحياه
وغير كدا مافيش يا ناس بتدور على العيش والدقيق بيتسرق عشان يتعمل جاتوه
وغير كدا مافيش ياولاد امكوا بتنادى من وجعها وانتو ودن من طين والتانيه من طين بردو
ربنا يستر
وومعلش فيه حاجه انا ناقلها بس حاسس انها بتعبر عننا كلنا
عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترفف
تنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نز
فمش انت اللى مصرى؟؟؟ جتك القرف
